Mayuh agi bala anembiak kemaya hari tu nadai kala ninga pengawa bemanang tauka belian lalu bisi sida ka udah kala ning tang angka enda kala meda bakani chara tauka gaya urang bemanang tauka belian.

Taja pen dunya udah moden/mansang, anang kitai tekenyit ati enti bisi ninga 2 3 iku bala kitai agi begunaka ka pengawa bakatu kena berubat ka pemedis ba tuboh, ngerai ka igi penyakit enggau pemedis kena ubat tauka pengaruh urang. Ba nengeri pen bisi bala kitai agi begunaka ka pengawa bemanang tu lalu ba menua pesisir, pengawa bemanang tu sigi endang agi dikereja.

Semina siti nyadi ka penanggul dalam pengawa bemanang tu ianya kategal bala manang nyau majak kurang tauka majak nadai. Tambah mega, pengawa tu nyau enda diguna tauka jarang dikena urang kategal bala Iban ka udah betukar pengarap, ianya pengarap Kristian.

Dalam pengarap Kristian, pengarap bemanang tauka belian tu sigi enda tau dikereja sekali laban pengawa ti bisi besangkut-paut enggau pengarap kitai mensia. Minta ampun aku nyebut, taja pen bakanya, tetap bisi siku 2 bala kitai Iban mengkang tauka ngemeranka pengawa bemanang tu laban ba runding sida, pengawa bemanang tu enda tau dilengka.

Siti utai ka ditanya aku ba randau tu, patut tauka enda pengawa bemanang tu dikereja kitai urang ka udah Kristian? Nama kabuah?